Endika Diaz argazkilariaren Arde la niebla erakusketa Orduña Hiria Museora iritsiko da datorren urtarrilaren 16an. Argazkilari amurrioararen lanak 1962an Urduñako portuan gertatutako istripua du abiapuntu. Ezbehar hartan mendate ezaguneko lehen bihurgunetik behera amildu zen Konpostela Orkestra zeraman autobusa, eta lau pertsona zendu ziren.
Diazek gertaera horren barruko bidaia introspektiboa proposatu du argazkien bidez. Euskal Herriko argazkilaritza topaketaren lehenengo edizioan saritua izan ondoren, Amurrioko La Casonan inauguratu zuen erakusketa propioa lehendabizikoz argazkilari amurrioarrak, 2025eko otsailean.
Urtarrilaren 16tik apirilaren 6ra
Urtarrilaren 16an inauguratuko dute Arde la niebla erakusketa Orduña Hiria Museoan. Aurkezpen ekitaldia 19:00etan egingo dute, Eriz Perezen zuzeneko musikarekin lagunduta.
Argitaratu berri duen argazki-liburua jendaurrean aurkezteko baliatuko du aukera Endika Diazek. Irailean jarri zuen abian argazkilari amurrioarrak liburuaren argitalpena finantzatu ahal izateko crowdfunding kanpaina eta aise gainditu zuen helburua.
Arde la niebla erakusketa apirilaren 6ra arte egongo da ikusgai, Orduña Hiria Museoaren ohiko ordutegiaren barruan.
