Aiarako EH Bilduk oharra zabaldu du jakinarazteko Aiara Batuzeko ordezkariak bilera batera deitu dituztela "Udalbatza eratu ondoren irekitako garai berriak eskatzen duen kudeaketa eta antolaketari heltzeko".
Izan ere, Aiara Batuzek Pruden Otegi alkategaiaren aldeko bozak eman ondoren, udalerriko hirugarren indarrak hartu zuen aginte makila larunbatean, ezustean.
EH Bilduko udal gobernu taldean hiru ordezkari daude, baina EAJk bost ditu eta Aiara Batuzek beste hiru, hortaz, gobernagarritasuna zaila da egungo egoeran.
Hori dela eta, udal gobernu berriak adierazi du: "Egungo indar korrelazioarekin, EH Bilduko hiru ordezkari Udal Gobernuan, zortzi zinegotziren aurrean (EAJko bost eta Aiara Batuzeko hiru), ez dago gobernagarritasuna bermatzeko ezta aldaketa politikak aurrera ateratzeko aukerarik".
Egoera hori gainditzeko, EH Bilduren aburuz, "Aiara Batuzek bultzatu duen gobernu berriaren programa eta antolaketa gaiei heldu behar zaie".
Negoziazio aro berria
Gogoratu beharra dago hau ez dela izango bi taldeen lehen negoziazio prozesua. Hain zuzen, pasa den astean elkartu ziren aztertzeko aukerak ote zeuden udal gobernua osatzeko. Edonola ere, elkarrizketek ez zuten emaitza positiborik utzi, Aiara Batuzek eta EH Bilduk adierazitakoaren arabera.