Ezbeharra gertatu da gaur goizean A-3641 errepidean, 07:20ak aldera. Zuhatzako herrian izan da, Ibaguengo bidegurutzetik 200 metro ingurura. Zehazki, kamioi bat irauli da eta horren ondorioz ospitaleratu behar izan dute gidaria. Usansolora eraman dute osasun zerbitzuek, eta Ertzaintza egon behar izan da errepidean trafikoa bideratzeko, 10:30ak arte.
Gogoratu beharra dago erakundeen gatazka puntua dela errepide hori. Izan ere, A-3641 errepidean ohikoak dira horrelako ezbeharrak. 2024an, esaterako, bi kamioik bide ertzean amaitu zuten urteko azken hilean, abenduaren 23an eta abenduaren 3an. Antzeko ezbeharrak gertatu zen 2025eko ekainean, eta egun bat baino gehiago behar izan zuten ibilgailua erretiratzeko.
Egoera errepikakor horrek isla du esparru politikoan. Izan ere, Okondoko Udalak exijitzen dio Arabako Foru Aldundiari errepidea ahalik eta lasterren hobetzea (herriko ume askok Aiarako ikastolara jotzen dutelako egunero), baina Aiarako Udalak aldarrikatzen du, ezer baino lehen, trafiko astuna debekatu behar dela bide horretan, arriskutsutzat jotzen baitute kamioen presentzia eta hartzen duten abiadura.