Aurki plazaratuko du Aketza Merinok bere bigarren liburua: 15 años. Las Guerras del siglo XIX en el Alto Nervión. Espainiako Independentzia Gerra eta Lehen eta Bigarren Karlistadak Aiaraldean nola bizi izan ziren ikertu du historialari amurrioarrak.
“Ez neukan ezer argitaratzeko asmorik”, aitortu du Merinok. Garai horretako prentsa kontsultatzen hasi zen, baina gerrei buruzko daturik topatzeko asmorik gabe. “Halako batean konturatu nintzen informazio asko nuela esku artean, horretako asko berria gainera. Nahiko ezezaguna da hemen gertatu zena”. Orduan erabaki zuen liburua idaztea.
Duela urtebete amaitu zuen lanaren zatirik handiena. “Argitaletxeetara jo nuen, baina azkenean liburua nire kabuz plazaratzea erabaki dut”. Urtarrilean aurkeztuko du liburua, eta eskualdeko hainbat txokotan jarriko du salgai.
Garrantzi handiko zonaldea
Merinoren aburuz, Aiaraldeak garrantzi handia izan zuen XIX. mendeko gerretan. “Eskualdea nahiko garrantzitsua izan zen karlistentzat. Hiriburu nagusia Lizarra izan zen, baina Carlos V. erregeak nahiko denbora igaro zuen hemen, Urduñan eta Amurrion batez ere”.
Bataila batzuk ere egon ziren zonaldean, Lehen Gerra Karlistan batez ere. “Oso borroka luzea eta garrantzitsua izan zen hura”, ziurtatu du idazleak, “Guda Zibilean baino askoz hildako gehiago egon ziren”.
![[AKETZA MERINO] Gure munduaren historia hobeto ulertzeko bost liburu](https://aiaraldea.tok-md.com/argazkiak/TPD/cache/aketza%20merino_tokikom_735x413.jpg)