Eusko Jaurlaritzak COVID-10aren pandemia dela eta hartutako neurriek eragin nabarmena izan dute asteburu honetarako programatutako ekintzetan. Jarduera batzuk bertan behera geratu dira eta beste batzuk tokiz aldatu dira.
Laudioko Gure Esku Dagok antolatutakoa da bertan behera geratu den ekitaldietako bat. Hala ere, Amurrioko zita mantendu dute, 18:00etan Katekesi aretoan.
Arakaldon egingo zen produktu ekologikoen prestaketari buruzko ikastaroa ere bertan behera utzi dute. “Ahal dugunean egingo dugu”, jakinarazi dute antolatzaileek. Herri berean ordu batzuk beranduago egingo zen Gau Beltzaren ospakizuna ere moldatu behar izan dute. Internet bidez egingo dute dinamika, bi bideo sareratuta.
Toki aldaketak
Beste ekintza batzuk, aldiz, tokiz aldatu behar izan dituzte. Biharko Plactonen kontzertua eskolako aterpera mugitu du Orozkorock elkarteak.
Aiaraldeko Gazte Koordinadora Sozialistak, aldiz, Laudioko Lamuza parkeko kasinotik udal erabilera anitzeko aretora mugitu du bere aurkezpena.
Udalen ekintzak, aurrera
Laudio eta Amurrioko udalek antolatutako ekintzak mantendu egingo dira asteburu honetan, segurtasun neurriak bermatuta egin daitezkeelako. Gauzak hala, Laudioalde eta Amurrio Antzokiko zinema eskaintzan ez da aldaketarik egongo momentuz.