Hiru gorroto delitu erregistratu zituen Ertzaintzak iaz Aiaraldean. Hala jasotzen du poliziak atzo goizean plazaratutako 2022ko memoriak. Kasu horietako bat Laudion jazo zen eta beste biak, aldiz, Orozkon. 2021ean, aldiz, mota horretako 4 delituren berri jaso zuen poliziak eskualdean.
Horrez gain, txostenak adierazten du gorrotozko erasoak pairatu dituzten pertsonetako bat Laudiokoa dela eta beste bat Amurriokoa. Hala ere, dokumentuak ez du zehazten harremanik dagoen bi pertsona horien eta eskualdean erregistratutako 3 delituen artean.
Aurreko urteetan bezala, Ertzaintzak ez du zehaztu ezta udalerrietako delituen nolakotasuna, “herri txikietan delitu horiek jasan dituzten pertsonek biktmizazio bikoitza jasan dezaketelako”.
Gauzak hala, ezer gutxi gehiago esan daiteke eskualdean jazotako kasuen inguruan.
%53ko igoera urtebetean
Araba edota Euskal Autonomia Erkidegoari dagokionez, aldiz, txostenak datu esanguratsu ugari jasotzen ditu. 438 gorroto-gertakari jaso dituzte 2022ko memorian. Ia guztiak (435) dira gorroto-delituak.
Azken hirurak, aldiz, "gorroto izaerako arau-hauste administratibo" gisa sailkatu ditu poliziak. "Aztertu diren 435 delituetatik 9tan diskriminazio anizkoitzak erregistratu ziren; hori dela eta, kolektibo babestuen aurkako delituak guztira 444 izan ziren, eta kopuru hori 2022an erregistratutako gorroto-delituen kopurua baino handiagoa da", azaldu du Ertzaintzak.
2016an ekin zion poliziak urteko txostena egiteari, eta ordutik hona delituen kopurua "esponentzialki igo" dela nabarmendu dute, batez ere, 2021etik 2022ra. Bi urte horien artean %53 hazi da delitu kopurua.
Ertzaintzaren aburuz, bi arrazoi daude ugaritze horren atzean: "Alde batetik, gorroto-delituak ugaritu izanari egotz dakioke, baina baita gizartearen kontzientziazio handiagoari eta tolerantzia txikiagoari, poliziaren eraginkortasun handiagoari, legegintzaren bilakaerari eta beste hainbat arrazoiri ere".
Arrazakeria eta xenofobia nagusi
Delitu motei dagokionez, gehienak arrazakeriari eta xenofobiari lotutakoak izan direla azpimarratu dute. Mota horretako 231 kasu erregistratu dituzte guztira, % 52, 2021ean baino % 42,6 gehiago.
Sexu-orientazio eta -identitateagatik egindako erasoak daude bigarren postuan, 96 kasurekin (2021ean baino %31,5 gehiago). Generoari lotutako kasuak, aldiz, 68 izan ziren iaz (%15,32).
Azken urteetako kasuak
2021ean 4 kasu erregistratu zituen Ertzaintzak eskualdean. Horien artean dago Amurrion urte horretako abuztuan jazotako eraso homofoboa.
2020an, aldiz, 7 kasu erregistratu ziren Aiaraldean. Orduan ere, Amurrion izan ziren gehienak, 5 guztira. Aiaran eta Laudion, aldiz, bana erregistratu ziren.
Aurreko urteetan ere egon dira beste hainbat kasu. Artziniegako jaietan bi eraso lesbofobo salatu zituzten 2019an. Bi urte lehenago, aldiz, CD Orduñak eta Indartsu Klubak adierazpen bateratua argitaratu zuten, lehen taldeko jokalariek partida batean jasotako irain eta mehatxu homofobo, arrazista eta xenofoboak zirela eta.
2019ko urtarrilean oso bestelako gertakaria jazo zen Lezaman: Polizia Nazional ohi bat atxilotu zuten, Ezker Abertzaleko familia baten etxearen aurka tiro egitea egotzita.
Hainbat mobilizazio egin ziren, gertatutakoaren atzean gorrotozko delitua zegoela nabarmentzeko, baina bermerik ordaindu gabe aske geratu zen atxilotua, eta ez zioten delitu hori egotzi.