Atzo agortu zen epea Ferosca I proiektu eolikoaren kontrako alegazioak izapidetzeko eta Aiaraldeko Mendiak Bizirik! plataformak 1.000 baino gehiago aurkeztu zituen.
Kaltetutako Udalen kudeaketa gaitasuna aintzat hartuta, plataformak modu anitzetan bildutako helegiteak utzi zituen Laudion, administrari gehien duen tokiko erakundea baita. Guztira, eskualdeko herritarrek sinatutako 1.032 alegazio aurkeztu zituzten.
Horiek ez ezik, Aiaran 141, Orozkon 23 eta Okondon 12 tramitatu zituzten herritarrek euren kaxara. Amurrioko Udalak, aldiz, 248 alegazio izapidetu ditu.
Aiarako Udalaren alegazioa
Herritarrentzako epea atzo amaitu bazen ere, Aiarako Udalak apirilaren 19ra arte izango du tartea bere alegazioa prestatzeko. Tokiko erakundeak luzapena eskatu zion Eusko Jaurlaritzari eta oniritzia jaso zuen.
Udal Gobernu Taldeak argitu du arlo juridikoa berezko bitartekoekin landu dutela, baina enpresa baten laguntza izan dutela ingurumenaren eta hirigintzaren esparruak aztertzeko.
Bide batez, Aiarako Udalak deia zabaldu die Administrazio Batzarrei eurek ere alegazioa sinatu ditzaten.
Laudioko Udalak ere iragarri zuen helegitea idatzi zuela.
Polemika
Hamaika salaketa egin ditu Aiaraldeko Mendiak Bizirik! plataformak eskualdeko egitasmo eolikoen tramitazioan. Esaterako, taldeak kritikatu zuen Ferosca I azpiegiturak Arabako Foru Aldundiko oniritzia izan zuela Foru Hauteskundeen hurrengo egunean. Zehazki, plataformak lege iruzurtzat jo zuen erabakia.
Gogoratu beharra dago Ferosca I proiektuak 200 metroko eta 4,5 MW-ko sei aerosorgailu eraikitzea aurreikusten duela eta inguruetan horrelako azpiegitura gehiago instalatu nahi dituztela: Ferosca II, Larragorri eta Las Americas 20.