Pasa den astean Aiaraldeko Mendiak Bizirik taldeak jakinarazi zuen ekainaren 16an agortuko zela denbora 'Mendi' zentral eolikoaren kontrako alegazioak egiteko. Ordea, aste honetan jakin izan dute hamar egun gehiago eskaini dituztela horretarako.
Hain zuzen, Mendiak Aske taldeak eskatu zuen luzapena eta Arabako Foru Aldundiak baimendu du. Horrek esan nahi du alegazioak deskargatu, sinatu eta aurkezteko beta dagoela oraindik.
Amurrion ere puntu fisikoak egon dira eta daude alegazioak sinatzeko: Mendiko Lagunaken egoitza, Garoa liburudenda eta Okeluri jatetxea (Berganza).
Orozkon ere eragina
Aiaraldeko Mendiak Bizirik taldeak gogor salatu duen egoera bat da 'Mendi'-k eragina duela Bizkaian, baina bertako Foru Aldundiak ez duela ezer argitaratu horri buruz. "Orozkoko 300 hektareatan sartzen da zentrala, Katadio eta Urrejola auzunetan, eta Aldundiak ez du ezer ohartarazi bere aldizkari ofizialean. Horrek ezinegona sortu du auzokideen artean", ziurtatu du plataformak.
Bide batez, taldeak azpimarratu du akats hori ez dela gertatu bakarrik 'Mendi' zentral eolikoarekin: "Arabako Foru Aldundiak agindu die Laudio eta Amurrioko Udalei erabakitzeko zeinek izapidetuko duen Ferosca I zentralaren plan berezia, baina Okondon ere eragina dauka egitasmo horrek. Aldundiek ez dute azaldu zergatik utzi dituzten Okondo eta Orozko prozesu hauetatik kanpo".
Ikertu gabeko kalteak
Aiaraldeko Mendiak Bizirik plataformaren alegazioek proiektu energetikoaren alde anitzak jorratzen dituzte. Esaterako, zentralen metaketaren kontra egiten dute alegazioek. Ferosca eta Las Americas egitasmoen eragin eremuak 450 metrora daude eta Larragorriko kasuan 150 metro dira.
Aerosorgailuen zarataren eragina ikertu ez dela, irizpide bateratuen falta edota babestuta dauden eremu eta espezieetan sortu ditzakeen kalteak aztertu ez direla ere kritikatzen du plataformak.
Taldeak kezka berezia adierazi du Luiaondoko egoeragatik. Izan ere, herrigunea bi zentral eolikoren eragin eremuaren barruan geratuko litzateke: Ferosca eta Mendi. Larragorrikoaren eragina oso gertu geratuko litzateke, gainera. Aiaraldeko Mendiak Bizirikek uste dut kalte metatuak ikertu beharko liratekeela.