Markixana eta Basaurbeko araztegiak 2026an hasiko dira lanean, Urbidek Aiaraldea Komunikabideari berretsi dionez. Julen Ibarrola Aiaraldeko batzordeko presidenteak azaldu du lehen sei hilabeteetan funtzionamendua probazkoa izango dela. "Azpiegitura eraiki duten kontratistek, Confederación Hidrográficak eta Urbidek berak lan egingo dugu elkarlanean dena ondo doala ziurtatzeko", aipatu du aiararrak.
18 langileren kontratazioa
Ibarrolak azpimarratu du erronka handia izango dutela eta Arabako Foru Aldundiaren laguntza jasoko dutela horretarako. "Aldundiak lizitazioa aterako du 18 behargin kontratatzeko, Markixana eta Basaurben lan egin dezaten eta bi urtez arituko gara horrela", zehaztu du Ibarrolak.
Izan ere, bi urte horietan bermatu nahi dute funtzionamendua eraginkorra dela eta Europak isurketengatik irekitako bi zigor espedienteak bertan behera utzi nahi dituzte.
Fase gehiago
Edonola ere, araztegien eraikuntzarekin ez da guztiz konpondu Aiaraldean isurketekin dagoen arazoa. "Industria ehun osoa ez da batu Markixana eta Basaurbeko araztegi sistemara, ezta zenbait administrazio batzar edota Orozko, hortaz, oraindik ere obra gehiago egin beharko ditugu", erantsi du Urbideko kideak.
Ahalegin ekonomikoa
Ibarrolak ere nabarmendu du orain arteko obrek zein etorriko direnak ahalegin ekonomiko izugarria eragingo dutela eta, ondorioz, kudeaketa ereduari buruzko hausnarketa egin beharko dutela. Halaber, tasen balioa jarri du eztabaidaren erdigunean. "2020tik ez ditugu igo eta 2026an ere ez dugu egingo, baina gero erabaki beharko dugu nola lortzen dugun kostuen gastua ordaintzea dauzkagun bitartekoekin", ohartarazi du Aiaraldeko batzordeko presidenteak.
Momentuz, izoriarrak espero du Foru Planen eta Europar Batasuneko dirulaguntzak erakartzea, baina gogoratu du Urbidek Arabako 108 tokiko erakunde barne hartzen dituela eta horren arazoa dela —aintzat hartuta Gasteizek ez duela parte hartzen— biztanleriaren sakabanaketa oso handia dela.
Prozesu luzea
Markixana eta Basaurbeko araztegien eraikuntza bideratuta dago eskualdean sortu den arazo historikoa konpontzera. Hau da, ibaietan isurketak eta kutsadura ekiditera. Horretarako hamarkadak igaro dira eta urrats ugari egin behar izan dituzte: azpiegituren lursailak ezjabetu eta erosi, finantzazioa lortu... Eta gainera, oztopoak ere egon ziren.
2018an izan zen lehen esleipena eta behin betiko egin zuten 2020an 31 milioi euroren truke
Bide horren mugarri oso garrantzitsua izango da, hortaz, 2026. urtea, azkenik funtzionatuko baitute azpiegiturek.