Alfredo Remirez amurrioarrak Entzutegi Nazionalean aurkeztutako errekurtsoa atzera bota du epaitegiak. Abokatuak Aiaraldea hedabideari jakinarazi dionez, momentuz ez du jaso kartzelaratze agindurik. "Zelan eta non errekurritu aztertzen ari gara. Autoa irmoa da, helegiteak ez luke bertan behera utziko agindua. Hala ere, geratzen saiatuko gara, edozein unetan eman lezakete espetxeratze agindua".
2017ko otsailean epaitu zuten Remirez, sare sozialetan terrorismoa goratzea egotzita. Akordioa lortu zuen defentsak fiskalarekin, ordea: urte eta erdiko kartzela zigorra eta 14 urte eta sei hilabeteko inhabilitazioaren kondena dela medio ez zen izan kartzelaratua.
"Txiolarien epaiketarekin atzera bota dute 2009ko auziaren suspentsioa eta espetxe zigorra betetzea ebatzi du epaitegiak. Zigorra berez ez diote ezarri, 2005ean ezarritakoaren suspentsioa atzera botatzea da egin dutena", adierazi du abokatuak. Hortaz, panpina ateratzeagatik bete beharko du urtebeteko espetxe zigorra.
Alfredo Remirezek ebazpena salatu du Twitter sare sozialean: "Espainiar estatua izan da 12 urteren ondoren urtebeteko kartzela zigorra ezartzea erabaki duena salatzeagatik dispertsioaren kontra nagoela kartoizko panpin batekin". Halaber, babes handia ari da jasotzen Remirez; besteak beste, Jabi Asurmendi Arakaldoko alkatearena, Katixa Agirre idazlearena edo Igor Elortza zein Oihana Bartra bertsolariena.
Mobilizazioak
Entzutegi Nazionalaren erabakiaren aurka protestatzeko mobilizazioak deitu dituzte. Gaur 19:00etan elkarretaratzea egongo da Amurrioko Juan Urrutia plazan. Ostiralean, aldiz, manifestazioa egingo da toki beretik abiatuta, 20:00etan.
KRONOGRAMA
- 2005: Amurrioko Jaietan Jose Anjel Biguri eta Santos Berganza presoen argazkiak izendatu zituzten festetako dama eta erregin "Herriarenak" jai koadrilakoek. Txupinazoan presoen argazki-panpinak atera zituzten balkoira.
- 2006: Amurrioko txupinazoko ekintzagatik epaitu zituzten Madrilgo Entzutegi Nazionalean. 2007an Auzitegi Nazionalaren esku geratu zen kasua.
- 2009: Urtebeteko kartzela zigorra ezarri zieten terrorismoa goratzeagatik. Bi urte baino gutxiagoko espetxe eskaera izaki, zigorraren suspentsioa ezarri zen.
- 2015: Sare sozialetako "Armiarma" operazioan atxilotu zuten @erreharria txiolaria, Twitterren publikatutako mezuetan terrorismoa goratzeagatik.
- 2017ko urtarrila: AlFREEdo plataforma herritarra sortu zuten Amurrion. Salaketa eta elkartasun kanpaina abiatu zuten.
- 2017ko otsaila: Otsailean epaitu zuten beste txiolari batzuekin batera Remirez. Fiskaltzarekin akordioa adostu zuen.
- 2017ko apirila: Twitterreko mezuen epaiaren ebazpena atera zen
- 2017ko iraila: 2009ko epaiaren suspentsioa ukatzea erabaki du Espainiako Entzutegi Nazionalak. Ondorioz, urtebeteko espetxealdia bete beharko du Remirezek.
