Tubos Reunidos enpresako langileek prozesu garrantzitsua hasi zuten atzo, hauteskunde sindikalak abiatuta. Gaur jarraituko dute euren ordezkariak hautatzen eta astelehenean amaituko dute prozesua.
Egun ELA, CCOO, UGT, LAB eta ESK sindikatuek dute ordezkaritza enpresa batzordean eta erakunde horiek jarraituko duten erabakiko dute bozkatzera deitutak dauden 864 beharginek (601 peoi espezialista eta 263 teknikari eta administrari).
Bozkatuko dutenen artean ez dira egongo Andoni Jugo eta Jon Ander Junquera, zeinek parte hartzeko asmoa zuten, nahiz eta negoziazio mahaietan enpresa ordezkari gisa aritu. ELAk, LABek eta ESKk helegitea jarri zuten hori ekiditeko, eta epaileak arrazoia eman die bi kasuetan, baina ez Emilio Miguelen kasuan.
Hauteskundeak une berezian helduko dira enpresara. Izan ere, aurten lan hitzarmen berria onartu dute langileek eztabaiden erdian, baina lan erregulazio espediente berri baten menpe daude eta, gainera, azpikontratatuko behargin batek istripu larria izan zuen enpresan. Horrez gain, Trapagako enpresako altzairutegia ere Amurriora mugitu dute eta proba fasean dabil.