Langile bat hil da gaur eguerdian Tubos Reunidos enpresan. Ertzaintzak 12:40ak aldera jaso du abisua, eta Osalaneko langileak eta komisio judiziala bertaratu dira.
Iturri sindikalen arabera, behargina teilatu batean zegoen lanean bertatik erori egin denean, eta Trapagarango Pavimprot azpikontratatutako enpresarentzat egiten zuen lan. Ertzaintzak baieztatu egin du behargina altuera batetik erorita hil egin dela, baina ez du informazio gehiago ematerik izan.
Vocento taldeak adierazi du langilea Luciano Arevalillo "Txano" izan dela, Abanto Clubeko bigarren entrenatzailea:
Ver esta publicación en Instagram
Mobilizazioak eta ekoizpena etetea
Tubos Reunidos konpainiako langile batzordeak zuzendaritzari exijitu dio ekoizpena 24 orduz gelditzea "modu kontrolatu eta seguruan". Bihar 14:00etan amaituko da lanuztea.
Horrez gain, elkarretaratzea deitu dute biharko, 9:00etan enpresako bulegoen aurrean, "elkartasuna eta errespetua" adierazteko hildako beharginari.
SOS Aiaraldeak, bestalde, mobilizazioa deitu du biharko 19:00etan Amurrioko plazan, prekarietatearen kontra.
ESKk enpresaren jarrera salatu du
ESK sindikatuko atal sindikalak, bere aldetik, Tubos Reunidoseko zuzendaritzaren jarrera kritikatu du istripuaren aurrean. Hasteko, sindikatuek eurek deitu behar izan diote lan ikuskaritzari, konpainiak ez baitu egin.
Bestetik, ESKk azpimarratu du enpresak ez duela erakutsi inolako prestutasunik ekoizpena gelditzeko eta langile batzordeak sakatu behar izan duela horretarako.
Ekoizpena 24 orduz etetea eskatu dio Enpresa Batzordeak zuzendaritzari, eta elkarretaratzea deitu dute bihar goizerako.
2023an istripu larria enpresan
Gogoratu beharra dago 2023an beste istripu larri bat gertatu zela Tubos Reunidosen. Kasu horretan PINE azpikontratatutako enpresako behargin batek erredura larriak izan zituen. Alegia, bere lankideek salatu zuten sekuelak utzi zizkiola ezbeharrak.
LABen eta CCOO oharrak
LAB sindikatuak oharra zabaldu du salatzeko azken 24 orduek odolustea ekarri dutela Euskal Herriko langileriari. Izan ere, Amurrioko heriotza ez da bakarra izan: "atzo, maiatzaren 26an, 49 urteko A.H.G. langile azpikontratatua hil zen Atxondon, AHTren lanetan. Pieza baten erorketak zauri larriak eragin ostean, odolustuta hil zen CONPROVIAL enpresarentzat lanean ari zen langilea. Bi hauei atzo Andosillan hildako 50 urteko langilearen heriotza batu behar zaie. Hiru hauekin, gutxienez 23 dira lan heriotzak Euskal Herrian urte hasieratik".
CCOOk ere oharra kaleratu du "sarraskia" gertatzen ari dela azpikontratatutako enpresen artean eta aldarrikatzeko prebentzio neurriak eta koordinazio neurriak beharrezkoak direla.
Halaber, CCOOk azpimarratu du EAEn iaz 25 langile hil zirela kolpe, erorketa edo harrapaketen ondorioz eta horietatik 16 azpikontratatutako beharginak zirela.
Aurtengo 23. lan heriotza
Azken honekin, 22 dira aurten Euskal Herrian erregistratutako lan heriotzak. Aiaraldean jazotako azkena iragan maiatzaren 6an izan zen, Bebidas Serrano enpresan, baina heriotza hura ez-traumatikoa izan zen, bihotzeko baten ondoriozkoa. Iragan urriaren 15ean, aldiz, urduñar bat hil zen Amiantec 3000 enpresarentzat lanean ari zela, kasu horretan ere altuera batetik erorita.
Hautsak are gehiago harrotu zituen Zorroza Gestión de Residuos enpresan 2020an gertatutako istripuak. Kasu horretan, Bassirou Dione jatorri senegaldarreko langilea zortzi metroko altueratik erori eta hil zen. Duela urtebete, enpresako arduradunek onartu zuten gorpua mugitu zutela lan heriotza ezkutatzeko.
Epaitegian egin zuten aitorpena eta sei hilabeteko espetxe zigorra ezarri zieten. Horrez gain, 30.000 euroko kalte ordaina eman behar izan zioten hildakoaren familiari.