Arrankudiagako plaza hartuko dute igandean gogoratzeko 2014ko azaroaren 2an herriak hitz egin zuela independentziaren alde. Horretarako jardunaldi xumea antolatu dute, hurrengo ekintzekin:
- 11:30etik aurrera, sortzaileen azoka egingo dute. Herriko eta inguruko sortzaileek parte hartuko dute. Euren lanak erakutsiko dituzte, eta, kasu batzuetan, baita saldu ere.
- 12:30ean ekitaldia izango da. Herriko musikariek emango diote hasiera. Gero, bertso musikatuak etorriko dira eta, ondoren, Gure Eskuko ordezkariak hitz egingo du. Musikarekin amaituko da ekitaldia eta gero mokaduaren txandak itxiko du ospakizuna.
Antolatzaileek aipatu dute efemeridea berpiztearen ideia Gure Esku plataformarena izan dela eta herrian hartu dutela lekukoa. Horretarako talde eragilea sortu eta egitaraua osatu dute, Ados plataforma 2014an bertan desegin baitzuten, helburu guztiak beteta.
"Herriko askok egun berezitzat dugu azaroaren 2 hura. Lehenago, independentzia aldarrikatu zuen lehen udala izan zen Arrankudiagakoa, 1979an. Eta 2024ko galdeketan, parte-hartzea handia izan zen eta estatu subiranoaren aldeko botoa nagusitu zen. Baina, horrez gainera, herritar asko eta asko inplikatzea lortu zen: Ados plataforman, antolatu ziren ekintzetan, galdeketaren egunean (hauteskunde-mahaian, txandetan, kaleko ekintzetan…). Egun historikoa izan zela esan daiteke", adierazi dute.
Azaroak 2, mugarri
Gogoratu beharra dago 2014ko azaroaren 2an Arrankudiaga-Zollon hautestontziak jarri zituztela jendeak argitzeko euskal estatu burujabe eta independente baten kideak izan nahi ote zuen. Erantzuna zabala izan zen, eta aldekoa gehienbat. Hain zuzen, bozkatzaileen %61,59ak parte hartu zuen eta %89,64ak eman zuen baiezko boza.
Arrankudiaga-Zollok Etxarriren ondoren deitu zuen galdeketa eta Gure Eskuk egun aldarrikatu nahi du duela hamar urte egindako lana emankorra izan dela. Berez, plataformaren aburuz, egungo eztabaida politikoa errazteko bidea ireki zuten geldeketa horiek (Etxarrin ere egin zen, esaterako, eta baita ere Orozkon 2017an edota eskualdeko gainontzeko udalerrietan 2018an) eta hori baliatzeko garaia heldu da.
Hortaz, hurrengoa ondorioztatu du Gure Eskuk: "Egun estatus politikoaren eta lurralde antolaketaren inguruan eztabaida eta prozesu politikoak irekita daude eta hauek balio behar dute benetako herri libre bat eraikitzeko, gure buruaren jabe bilakatzeko. Orain da momentua tresna horiek zehaztu eta indarrean jartzeko".