8 milioi euroko inbertsio berria aurkeztu zuen atzo Laudio Autoglasek. Horren bidez, labe berria instalatuko dute lantegian eta produktu eta lerro berri oso bat ekoizteari ekingo diote. Lantegian instalatuko den 8. labe horrek urtean 800.000 pieza ekoizteko gaitasuna izango du. Zuzendaritzak "produktu-gama handitzeko apustu estrategikotzat" jo du inbertsioa.
Gainera, mozketa linea berria ere instalatuko dute eta, horri esker, orain arte fabrikatu ezin zituzten zenbait modelo atera ahalko dituzte Laudioko faktoriatik.
Enpresaren aurreikuspenen arabera, datorren urteko apirilean hasiko dira makineria berria lantegian jartzen. Dena ondo bidean, 2022ko azaroan funtzionamenduan egongo lirateke bi lerro berri horiek.
"Aiaraldeko enplegua bermatzeko urratsa" dela adierazi dute Enpresa Batzordeko kideek
Inbertsio gehiago
Inbertsio berri honi 2020ko urrian Parter Capital taldeak iragarritako 5 milioi euroko inbertsioari gehitu behar zaio.
Orduan iragarritako diru partida hori, 3 azpiegitura berri egokitzeko bideratu dute: garbigailua, laminazio lerroa eta ikuskatze sistema berria. Instalazio berri horiek ere aurki egongo dira funtzionamenduan.
Enpresa Batzordearen balorazioa
Langileen ordezkariak pozik azaldu dira enpresak aurkeztutako neurriekin. Azpimarratu dute 8 milioi eta 5 milioi euroko azken inbertsioak lantegiaren etorkizunaren aldeko apustu argia direla. Horrez gain, oso modu positiboan baloratu dituzte ere bi produkzio lerro berriek epe ertainean sortuko dituzten lanpostuak.
"Aiaraldeko enplegua bermatzeko urratsa" dela adierazi dute Enpresa Batzordeko kideek, eta inbertsioek Laudioko lantegian ez ezik, eskualde osoan ere eragina izango dutela azaldu dute.
Laudio Autoglas
Parter Capital Group AG inbertsio talde suitzarrak 2020ko martxoan, erosi zuen Guardain enpresako ibilgailuen linea, COVID-19ak eragindako pandemia hasi berri zenean, eta Laudio Autoglas sortu zuen. Salmentaren ostean, Guardian 209 langilerekin geratu zen, duela 10 urte baino 600 gutxiago.
Laudio Autoglasek, bere aldetik, Enpresa Batzordea osatu beharra zuen, eta azaroan egin zituzten hauteskunde sindikalak. 181 langiletik 162k bozkatu zuten eta ELA sindikatua atera zen garaile, bozen gehiengoa lortuta.