Jaiak bertan behera geratu diren arren, Laudioko San Roke Kofradiako kideek ez diote euren urteroko zitari hutsik egin. Ekitaldia egin dute San Pedro elizan, mezaren eta Andere abesbatzaren emanaldiaren ostean.
Jose Luis Navarro maiordomo nagusiak hartu du hitza bertan. Hitzarte orokor batekin eman dio hasiera ekitaldiari. Krisi klimatikoa, gazteek dute baliabide eza eta eskualdeko egoera sozioekonomikoa aipatu ditu, besteak beste.
Kofradian 50 urte bete dituzten kideak omendu dituzte jarraian. Diploma bana eman diete aurten langa hori gainditu duten kofradeei. Ondoren, Ohorezko Pitxerrak eman dizkiete Angel Larrea eta Egoitz Bernaolari.
Larrea izan da aitortza jasotzen lehena. Juan Ibarrola Orueta militar errepublikanoari buruz idatzitako liburuagatik eman diote pitxerra, Navarrok nabarmendu duenez. “Laudioko Memoria Kolektiboa berreskuratzeko liburuak plazaratu genituenean Guda Zibilaren eta errepublikaren garaiak ez lantzea erabaki genuen, afera delikatuak zirelako”, oroitu du Kofradiako buruak, eta aldarrikatu du badela garaia gai horri heltzeko. Horri begira egiten den lehen ikerketa seriotzat hartu du Juan Ibarrola Oruetari buruzko biografia.
Bernaolak, aldiz, Laudioko bi artisten biografiak idazteagatik jaso du oroigarria: Joaquin Barbara y Balza margolariarena eta Julian Martinez de Villar musikariarena. “Joaquin Barbara y Balza da Laudioko margolari garrantzitsuena, baina ia erabat ezezaguna zen”, azaldu du Navarrok, “ berdina gertatzen da Julian Martinez de Villar musikariarekin, Laudioko txistulari baten semea zena”.
Arloteen emanaldia plazan
Elizako ekitaldia amaitu denerako hasia zegoen jada Arloteen emanaldia. Ruperto Urquijo musikariaren jarraitzaileek hainbat abestiren bertsioak eskaini dituzte dozenaka herritarren aurrean.
Arratsaldean jarraituko du jai giroak, Aurresku eta Fandago eta Arin Arin txapelketak egingo baitira seietatik aurrera Herriko plazan.