Laudioko Udal Hiltegiaren itxiera

Azalpen gehiago ematea edo errektifikatzea eskatu diote baserritarrek Laudioko Udalari

'Hiltegia Ez Itxi' plataformak irailean egindako mobilizazioa. / Aiaraldea.eus

Haserre azaldu da Hiltegia Ez Itxi plataforma, iragan astean Laudioko Udalak azpiegitura itxita mantenduko zuela iragarri ostean. Baserritarren iritziz, uztailaren 2an ezarritako kautelazko itxiera aldez aurretik pentsatutako erabakia zen.

Laudioko Udalak hiltegia itxita mantenduko zuela iragarri zuen urriaren 21ean, azpiegitura berriro zabaltzeko prozedura guztia bertan behera utziz. Albisteak haserrea piztu du Hiltegia Ez Itxi plataforma osatzen duten ekoizle, harakin eta kontsumitzaileen artean, eta iragan urriaren 21ean egindako adierazpenak errektifikatzea edo azalpen gehiago ematea exijitu diote Udal Gobernuari.

Besteak beste, hiltegiak osasun baldintzak betetzen ez zituela azaldu zuten Ander Añibarrok eta Joseba Amondok prentsaurrekoan. Baserritarrek ez dituzte adierazpenak onartu, eta bete gabeko osasun baldintza horiek zeintzuk diren zehaztea eskatu diete udal ordezkariei. Osasun baldintzak ez betetzeagatik salaketarik egon den, eta egotekotan zigorrik ezarri den eta neurri zuzentzailerik hartu diren jakin nahi du ere plataformak.

Defizita zalantzan

Hiltegiaren itxiera defendatzeko tokiko erakundeak mahaigainean jarritako beste argudio nagusietako bat, hiltegiaren izaera defizitarioa izan zen. Udal Gobernuak 80.000 eta 50.000 euro artean kokatu zuen azpiegiturak urtean sortutako zorra. Hiltegia Ez itxi plataformak kezkagarritzat jo du udalak defizit hori zehaztu ezin izana.

Plataformak aurkeztutako datuen arabera, hiltegiak 10.000 euroko irabaziak sortu zituen 2018an 

Plataformak aurkeztutako datuen arabera, 2018an hiltegiak 10.000 euroko irabaziak sortu zituen. "Horrek bi egoera posibletara garamatza, bata bestea baino okerragoa dena; lehena, 2019ko gatazkan gertatu zen bezala, datuen irakurketa zuzena egin ez izana, berez txarra dena, baina bigarrena are okerragoa litzateke, 2019an 10.000 euroko superabita duen azpiegitura bat hartu izana eta oraindik kuantifikatzen ez dakiten defizit batera eraman izana", azaldu dute baserritarrek.

Baserritarren proposamena, "delitua"

Osteguneko prentsaurrekoan aipatutako hirugarren alor batek ere piztu du plataformako kideen haserrea. Izan ere, baserritarrek udal hiltegia behin behinean kudeatzeko egindako proposamena legez kanpokoa dela azaldu zuen Ander Añibarrok. "Ez dakigu jabetzen baden Laudion bertan kultur eta kirol elkarte ugari daudela beren jarduerak garatzeko azpiegitura publikoak kudeatzen dituztenak. Elkarte hauek eta udal hau delitutan ari dira?" galdetu du plataformak.

Are gehiago, Aguraingo eta Etxarri-Aranatzeko hiltegien adibideak jarri dituzte mahaigainean adibide modura. Bi udalerri horietan Aiaraldeko baserritarrek aurkeztutako alternatiba baliatu izan da , hitzarmen bidez, hiltegien kudeaketari eutsi ahal izateko.

Udalaren jokabidea "absolutismo ilustratu berritzat" jo dute

Hori guztia dela eta, urriaren 21eko prentsaurrekoan esandakoak errektifikatzea edo azalpen gehiago ematea eskatu du Hiltegia Ez Itxi plataformak. Bere ustez, uztailaren 2an ezarritako hiltegiaren kautelazko itxiera aldez aurretik hartutako erabakia izan zen, eta aurkeztutako argudioak "ke estalki bezala erabilitako aitzakiak" besterik ez dira, plataformaren iritziz.

Udalaren jokabidea "absolutismo ilustratu berritzat" jo dute, "herriaren gizarte-ehunaren gainetik pasatzen". Skate pistaren afera edo iragarritako anbulatorio berria jarri dituzte horren adibide moduan.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide