Lanuzteak egiteari ekin diote Tubos Reunidoseko langileek, lan hitzarmenaren defentsan. Ordubetez uzten ari diote lan egiteari txanda bakoitzeko, eta hiru astez luzatuko dute protesta.
Hau da lanuzteen egutegia, txandaren arabera:
Gaueko txanda
00:00etatik 1:00etara utzi zioten lan egiteari asteartean eta gaur (osteguna); eta berdina egingo dute otsailaren 1, 3, 8 eta 10ean.
Goizeko eta arratsaldeko txandak
Atzo (asteazkena) mobilizatu ziren goizeko eta arratsaldeko beharginak. Bihar ere mantenduko dute deialdia, eta baita otsailaren 2, 4, 9 eta 11n ere.
Goizeko txandakoak, aldiz, 7:00etatik 8:00etara geldituko dira. Eguneko eta arratsaldeko txandetan daudenek, berriz, 15:00etatik 16:00etara egingo dute elkarretaratzea.
Lan hitzarmena hobetzea helburu
Lan hitzarmenaren egoera dela eta ekin diote langileek mobilizatzeari. 2016tik dago iraungita dokumentu hori, eta zuzendaritzak negoziazioa erabat blokeatu du, sindikatuen arabera.
Bi gauza dira, funtsean, langileek negoziatu nahi dituztenak:
- Lan hitzarmen berria: 5 urte daramatza blokeatuta guztira.
- Hitzarmenik gabe egon diren bost urteetan eman beharko litzatekeen soldata igoera: Langileen ordezkariek defendatzen dute igoera hori Kontsumoaren Prezio Indizearen (KPI) araberakoa izan behar dela, beharginek erosmen ahalmenik galdu ez dezaten. Enpresak, bere aldetik, uste du balizko igoera hori enpresaren emaitza ekonomikoen araberakoa izan beharko litzatekeela.
LABen sail sindikalaren oharra
LABen sail sindikalak positiboki baloratu du mobilizazioak abiatzeko sindikatuen artean lortutako akordioa, zuzendaritzaren aurrean “langile batasuna” indartzeko balioko duelakoan.
Egoera ezegonkorra lantegian
Egoera ezegonkorra bizi izan da Amurrioko lantegian azken urtean. Enpresak 112 milioi euroko mailegua jaso zuen SEPIren partetik, bere egoera ekonomikoa bideratzeko. Ia aldi berean, akziodunen batzarrak %21,7 igo zituen zuzendaritzako kideen soldatak.
Udaren amaieran beste albiste garrantzitsu bat plazaratu zen: Tubos Reunidosek Trapagarango altzairutegia itxi eta Amurriora ekarriko zuela bertako azpiegitura, bidean enplegua suntsituz. Hori dela eta, bertako langileak mobilizatzen hasi ziren, eta Amurrioko langile ugari batu zitzaizkien.