CD Laudiok atzo abiatu zuen hauteskunde prozesua zuzendaritza berria izendatzeko. Errolda osatu ostean, helegiteak jartzeko aukera egongo da eta maiatzaren 11tik aurrera, 18ra bitartean, hautagaitzak aurkeztu beharko dituzte.
Helegiteen ondoren, maiatzaren 24an egingo dira publiko hautagaien zerrendak eta bakarra egongo balitz, maiatzaren 24an egingo litzateke ez-ohiko batzarra. Hautagaitza bi edo gehiago egonez gero, bozkatzeari ekingo liokete maiatzaren 31n.
Gogoratu beharra dago CD Laudio Erregional Preferente kategorian jokatzen duela. Berez, 2013-2014 denboraldian 2. B mailan aritu zen, baina lorpen horrek, azkenean, arazo ekonomikoak sortu zituen. Denboraldi horretan klubak jokalarien soldatak ordaintzeko zailtasunak izan zituen. Izan ere, zuzendaritzak aurreikusitako diru laguntza Arabako Foru Aldundiaren aldetik uste baino txikiagoa izan zen eta aurrekontua kontrolez kanpo joan zitzaien.
Horren ondorioz, klubak zor handiak pilatu zituen jokalariekin, entrenatzaileekin eta hornitzaileekin eta desagertzeko zorian egon zen. Gauzak horrela, 2018an jende berriak hartu zuen kirol elkartearem kudeaketa eta zegoen zorra bideratu dute azken urteetan.