Aste hasieran jakin zen Autoglas-Glavistako egoerak 180 graduko bira eman zuela, konpontzeko zorian egotetik urte hasieran baino egoera larriagoan egotera igaroz.
Bileraz bilera igaro du azken astea Enpresa Batzordeak, eta elkarretaratzea eta prentsaurrekoa deitu ditu datorren astelehenerako. Laudioko lantegiaren aurrean bilduko dira 11:00etatik 12:30etara, eta eskualdeko herritar guztiei luzatu diete bertaratzeko gonbita.
Bertan azalduko dituzte azken bi asteetan gertatutakoaren nondik norakoak. Hala ere, ELAko sail sindikalak egungo egoeraren hainbat gako plazaratu ditu dagoeneko sare sozialen bidez. Langileen ordezkarien aburuz, Laudioko lantegiko 240 beharginak “muturreko egoeran” daude, fabrika “desagertzeko zorian” dagoelako. “85 urte baino gehiago dituen enpresa hau egun batetik bestera itxi daitekeela ikusten dugu. Drama handiko hilabeteak izan dira, eta inork ez daki guk baino hobeto zer jasaten ari garen”, salatu dute.
“Gorabehera emozional” handiko hilabeteak izan dira azkenekoak Autoglas-Glavistako langileentzat. Azaldu dutenez, azken salerosketa akordioaren ostean, fabrika uztailaren 3an irekiko zen berriz, baina ez zen hala izan, “negoziazioko bi aldeen arteko desadostasunengatik”.
Guardianen lursail batzuetan dago arazoaren muina, multinazionala uko egin baitio horiek saltzeari Autoglas-Glavistako balizko erosleari.
Zehaztu dutenez, Guardian Glass Europeren lursail batzuetan dago arazoaren muina. Multinazionalak uko egin dio orube horiek saltzeari, eta Autoglas-Glavistaren balizko erosleak dio lur horien beharra duela enpresan egin nahi duen proiekturako. Kontuan hartu behar da Autoglas-Glavistaren azpiegiturak Guardianen lursail batzuetan daudela, enpresa hori Guardinen parte izan baitzen 2020. urtera arte.
Horregatik, langileek uste dute Guardian dela egungo egoeraren erantzule nagusia: “Duela 3 urte, Guardianek Parter Capital funts-putreari saldu zigun, automobil-negozioaz eta hura osatzen zuten langile guztiez libratzeko asmoz, eta orain Guardian berriro sartu da eszenan, lursail jakin batzuk saltzeari uko eginda”.
Horregatik, alde guztien akordio batera heltzea da premiazkoena, ELAko sail sindikalaren aburuz, egoera “muturrekoa eta jasanezina” delako. Nabarmendu dutenez, enpresak jarraitzen du lan-karga izaten eta, beraz, enpresa-jarduerari berriz ekin behar dio, “etorkizuna izateko”.
