Kulturlab egitasmoak ez du atsedenik hartuko udan. Duela urtebete abiatu zuten ekimena, dinamika sinplearekin: Laudioko edo Aiaraldeko sortzaile bat gonbidatzen dute hilero Zumalakarregi etorbideko paretetako batean mural bat atontzera. Hormairudiak hilabete osoan zehar daude ikusgai, hurrengo sortzailearen txanda iritsi arte. Orain arte, 14 bizilagunek parte hartu dute proiektu kolektiboan.
'Zubiko Malekoia' osatzen dute tabernek, euren aldetik, antzeko egitasmo bat jarri zuten martxan maiatzean, Zubiko Kurajo kaleko pareta batean. Eta orain, bi ekimenek bat egin dute, sorkuntza eskaintza bikoitza osatuaz. Gauzak hala, uztailean Belen Herrerok bi mural atondu zituen, bi tokiak apaintzeko; eta orain, abuztuan, berdina egin du Susana Corbellak, antzeko estiloko bi lan plazaratuaz. Gorputzaren lurraldea izena jarri dio artista laudiorrak Zumalakarregi etorbideko muralari, eta biologiari lotutako elementuak (tolesdurak, hezurrak, azalak edota formak) izan ditu inspirazio iturri. Modu horretan, amak eta euren "gorputz-lurralde-aterpea" omendu nahi izan ditu.
Zubiko Kurajoko muralak, aldiz, Hezurrak egiten du izenburu, eta gorputzeko atal horiek ditu ardatz. "Egituraren malgutasunari eta gogortasunari eta indarrari eskainitako obra da", Corbellaren hitzetan.
Zeramika du lanabes Susana Corbella Eguiluzek, eta ibilbide luzea egin du esparru horretan, hainbat erakusketa, arte-eskola eta bestelako egitasmotan parte hartuta. Gaur egun, Basauriko Anitza Arte Eskolako zuzendaria da.
Muraletako zeramika piezen argazkiak egiteaz, aldiz, David Corbella Eguiluz arduratu da.
Argazkiak: Luisan Garcia