Laudioko Udalak oharra zabaldu du gaur jakinarazteko ez duela errekurtsorik eramango Madrilera EAEko Auzitegi Nagusiaren azken ebazpenari lotuta. Gogoratu beharra dago erabaki horretan epaileek berretsi zutela tokiko erakundeak lanpostua itzuli behar diola langile bati, nahiz eta euskarazko hizkuntza eskakizuna ez bete.
Ana Maria Martinez Varas epaileak hautsak harrotu zituen bere ebazpenean, besteak beste, ziurtatu zuelako euskara oso hizkuntza zaila zela.
Gauzak horrela, eta helegitea aurkeztu edo ez arrazoitzerako orduan, Laudioko Udal Gobernu Taldeak honakoa adierazi du: "Argudio materialak egonda ere, Goreneko baldintzek ez dute epaiaren edukiaren kontra egiteko biderik bermatzen, aitzitik, euskararen aurkako jurisprudentzia sortzeko bidea erraztu dezakete".
Hau da, Udalak azpimarratu du, beste hitz batzuekin, Espainiako Auzitegi Gorenak duen osaketa politikoak euskaldunen eskubideen kontra egin dezakeela, eta horregatik ez dutela bertara joko.
Zehazki, tokiko erakundeak aipatu du egungo egoera politikoak ez duela marko juridiko segurua eskaintzen. "Izan ere, euskararen eta euskal hiztunen hizkuntza eskubideen aurkako oldarraldi judiziala agerikoa da, Laudioko Udalaren kasuan Gazteizko epaileak emandako argudioek erakutsi bezala", nabarmendu du Ainize Gastaka alkateak.
Behargina berriro onartzeari dagokionez, Udala bere langile taldean sortutako egoerari nola aurre egin azterten ari da.
Epaia, "euskarafoboa"
Epaiak hautsak harrotu zituen iaz eta mobilizazioak eta erantzunak eragin zituen Laudion bertan zein Euskal Herrian. Euskalgintzako eragileek "epaileen oldarraldiaren" barruan kokatu zuten gertakaria:
Epaiaren aurkako helegitea aurkeztu zuen Udalak orduan EAEko Auzitegi Nagusian, baina honek ere bere horretan mantendu zituen epailearen argudioak. Orduan ere, mobilizazio eta elkarretaratzeekin erantzun zuten euskalgintzako agenteek.
Berez, Ana Maria Martinez Varasek argudiatu zuen euskara munduko bost hizkuntza zailenen artean dagoela. Halaber, aipatu zuen udal langilea 1.295 orduz joan zela klasera, euskara eskakizunaren lehen profila lortu zuela soilik eta tokiko erakundeak oso sentsibilitate gutxi erakutsi zuela berarekiko.
