Guardian Llodio udalerriaren bihotzean orbain industrial ikaragarria utziko duen kronika izan da. Urtarrilaren amaieran azken kolpea eman zioten lantegiari float labea itxita (matxura bat izan zuela argudiatuta), baina aurretik hainbat erabaki hartu dituzte Guardian Groupek eta Koch Industriesek azpiegitura guztiz husteko.
Laminatu laua
Galera zerrenda horren lehen mugarria 2000. urtea baino lehen gertatu zen. Zuzendaritzak Tuterara eraman zuen laminatu laua eta Laudio ekoizpen lerro hori gabe utzi zuen.
Zehazki, negozio arlo hori float labearen osagarria zen. Han produzitzen zen beirari plastiko plantxa bat jartzen zitzaion eta gainean beste beira bat. Egun Tuteran jarraitzen du lanean ekoizpen-lerro horrek.
Labe inprimatua
2013ko kolpea esanguratsuagoa izan zen, labe inprimatua desagertu baitzen. Langileentzat azpiegitura mitikoa zen, hamarkadak baitzituen. Horrekin, beira modu epelean egiten zen, metalezko egituretan sartzeko (balkoietarako edota igogailuen ateetarako). Dena den, merkatu horren gainbeheraren ondorioz, desagertu zen.
Horrez gain, aipatzekoa da urte horretan ere saldu zuela multinazionalak Guardian Express Auto, eta 2014. urtearen hasierarako bertako langile guztiak geratu zirela kale gorrian.
Beira epela
Horrez gain, urte berean beira "epela" egiteari ere utzi zioten. Labe horrekin tenperatura epel batekin amaitzen zuten produktua, kolpea jasoz gero, hamaika zatitan ez apurtzeko eta zauriak ekiditeko, autoen beiren kasuan bezala. Kasu horretan, eguzki plakak egiteko baliatzen zuten, baina bizpahiru urte igarota, alboratu zuten.
Velglas
2015ean Velglas ekoizpen lerroa ere alde batera utzi zuten. Etxerako beirak egiten zituzten bertan, dutxa-itxiturak eta bestelako elementuak saltzeko.
Laudiokoa eta Tuterakoa zituen enpresak, baina eskualdekoa baztertu eta Nafarroan dagoena mantendu zuten.
Zilarreztatzea
Zilarreztatze linea ere desagerrarazi zuten 2018an. Makina horiekin ispiluak eta etxean erabiltzen diren kolorezko beirak produzitzen zituzten, bai marrazkiekin zein ilunak. Berriro ere, Tutera geratu zen negozio horrekin.
2020an Glavista
Negozio jauzi horien ondoren, enpresak salto berria egin zuen eta 2020an Parter Capitali saldu zion Autoglas Glavista haizeztagailuen lerroa, epaitegian dagoen maniobra batean.
Guardianek aspaldi hartutako erabakia zen hori: autoen merkatutik alde egitea. Alegia, aurretik Guardian Express saldu zuten -haizeztagailuen bezeroei zerbitzua ematen zien- Luxemborgoko lantegia enpresa lehiakide bati saldu zioten. Operazio horrekin, Laudion zituzten langileen erdia baino gehiago kendu zuten gainetik eta urtarrilean ofizial egin zuten askok susmatzen zutena, hau da, float lerroa ere itxiko zutela, matxura txiki bat argudiatuta.
Laudioko lerroen desagerpenak eta Tuterako azpiegituren jarraipenak erakusten du Christopher Leonardek aipatutakoa Koch Industriesi buruz, baina praktikan: lantegiak leku ahalik eta merkeenetara eramatea dela euren lehentasuna. Tuterako langileak trebatu zituen beharginak adierazi dio Aiaraldea Komunikabideari han kontratatuta dituzten pertsona gehienek landa eremuan ere lan egiten dutela, euren lurretan, eta ez dutela aldarrikapen gogo askorik, ez baita euren lehentasuna.
Horrez gain, etorkizunera begirako etekin aurreikuspenak betetzen ez zituzten lerroak ere kendu zituzten, azkenean, Laudioko faktoria guztiz hustu arte.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!