Envac Iberia enpresak akordioa egin du Laudion, Barakaldon eta Galdakaon bilketa neumatikoa egiten duten beharginekin. Modu horretan, amaiera eman diote zortzi hilabeteko greba mugagabeari.
Borroka luzearen ostean, konpainiako hamasei langileek lortu dute Espainiako estatuko hitzarmenaren baldintzak hobetzea. ELAk azaldu duenez, erresistentzia kutxari esker egin diote aurre zortzi hilabeteko lanuzteari eta honako hobekuntzak erdietsi dituzte:
- 4 urteko indarraldian (2024-2026), % 40rainoko igoera eskala txikienetarako (gehienak): 4 urtean 530 euroko plus finko eta xurgaezina kobratzera iritsiko da plantilla osoarentzat (150€ 2025ean: 260€ 2026an; 395€ 2027an; 530€ 2028an).
- Urteko lanaldia 200 ordu murriztea lau urteko epean, 1789 orduko jardunaldia izatetik 1591 ordu izatera pasatuz.
- Txanda-kontraturako eskubidea bermatzea.
- Lan-erreformaren aurkako klausulak onartzea.
- 100 euro eguneko hoditerian sartzeagatik.
- Jaiegunetan eta igandeetan lan egindako orduaren prezioa bikoiztu egingo da.
- Ordainpeko 8 ordu urtean batzarretarako.
- Norberaren gauzetarako egun bat, ordaindua.
- Lanpostu hutsen akordio bat, lanpostu hutsen bat dagoenean enpresak plantillari lanaldi partzialean daudenei eta aldi baterako kontratuak dituztenei eskaintzeko betebeharra izan dezan.
Martxoan abiatutako greba mugagabea
Envac Iberiako langileek martxoan hasi zuten greba hitzarmen propioa eskuratzeko. Lehenengo deialdia hilabetekoa izan zen eta hasi baino lehen elkarrizketak egon ziren enpresarekin, baina ez zuten fruiturik eman. Hain zuzen, egun berean greba bertan behera utzi zuten eta berriro deitu zuten, ikusita negoziazioek ez zutela emaitzarik eskaintzen.
Apirilean, hilabeteko lanuztea luzatu zuten maiatzera arte eta azkenean zortzi hilabetez egon dira egoera berean. Gatazka horrenbeste luzatu izanak bistako eragina izan zuen Laudion.