Aiaraldeko Euskararen Eguna aurkeztuko dute bihar eta informazio guztia lehen eskutik jasotzeko eta egitasmoa bera babesteko agerraldi publikoa deitu dute Lamuza plazan 17:30ean.
Izan ere, Aiaraldeko Euskalgintza Kontseiluak antolatuko du ospakizuna eta herritarrei euren babesa adierazteko eskatu die.
Berez, kontseiluak hamar urte bete ditu aurten eta azken hamarkadan egindako lan nekaezina ganoraz ospatu nahi du.
Horretarako, aurreko urteetan bezala, egun osoko egitaraua prestatuko du abenduaren 3ko atarian eta Laudio hautatu du horretarako. Hain zuzen, udatik ari da elkarlanean hainbat eragilerekin jaia antolatzeko.
Berez, igarotako hamarkada honetan antzeko ospakizunak egin ditu eskualdeko txoko anitzetan, izan Artziniegan, Arakaldon, Okondon, Luiaondon edo Amurrion.