Irailaren 1a parrandaren amaiera eta errutinaren itzulera ekarri du aiaraldear askorentzat, baina ez orozkoarrentzat. Izan ere, gaur abiatu dituzte San Antolin jaiak. Ezkerpaella lehiaketarekin berotu dituzte motorrak goizean, eta arratsaldeko zazpietan jaurti dute txupinazoa.
Herriko Berbalagun taldeko kideak arduratu dira horretaz. Euskararen aldeko aldarri sendoa plazaratu dute pregoilariek udaletxeko balkoitik. Euskara hutsez irakurri dute testua, eta gazteleraz esan dituzten esaldi bakanak herritarrak hizkuntza ikastera animatzeko izan dira. Euskararen aldeko kanten estrofak ere tartekatu dituzte, plazan bildutako herritarrekin batera abestuta.
Bestelako gaiak ere izan dituzte hizpide. Gazan Israel egiten ari den genozidioa salatu dute, eta gogoan izan dituzte baita ere jaietan herritik kanpo daudenak. Horri lotuta, aipamen berezia egin diote iragan ostegunean zendutako Maika Garbirasi, 2016an jaietako pregoilari izandakoa.
Igandera arte luzatuko dira sanantolinak Orozkon. Hemen ikusi daiteke egitarau osoa.
Aiaraldea Komunikabideko kideak udaletxeko balkoian egon gara txupinazoan, zuzeneko emisioa egiten:
Argazkiak: Naia Vallejo Torres