Morarti ekoiztetxea Maspalomas filma grabatzen ari da Urduñan. Ekoiztetxearen seigarren fikziozko film luzea da eta Jose Mari Goenaga eta Aitor Arregik zuzenduko dute. “Pelikulak Vicenteren, adineko gizon homosexual baten, bizitza kontatzen du. Adinekoen egoitza batean sartzen denean, armairura itzultzea erabakiko du”, azaldu dute ekoizleek.
Jose Mari Goenagak idatzi du gidoia eta ildo intimista duen filma dela aurreratu dute . “Maspalomas konfinamendu psikologiko eta identitate ezabatuen inguruan hausnartzeko pelikula bat da” adierazi du gidoilariak. Jose Ramos Soroiz, Nagore Aranburu, Kandido Uranga, Zorion Egileor eta Kepa Errazti aktoreak dira filmeko protagonistak. Miren Gaztañaga aktoreak ere parte hartuko du, Aiaraldea Komunikabideari aurreratu zionez.
Euskal Herriko eta Kanarietako hainbat lekutan grabatuko dute pelikula, eta egunotan Urduñan dabiltza grabatzen.
Hainbat pelikulen eszenatoki
Urduña hainbat ikus-entzunezkoen eszenatoki bihurtu da azken urteetan. 2020. urtean Alardea telesaila grabatu zuten. Iaz El bus de la vida filmaren eszenatoki bihurtu zen hiria eta aurtengo otsailean Julio Medem zuzendaria bertaratu zen Ocho pelikularentzat eszenatoki bila. Horrez gain, Alex de la Iglesiak ekoiztutako Los Muertimer filma ere grabatu dute bertan udan.
