Langile bat hil da gaur Murgako Aianox enpresan, bihotzekoak jota. Ertzaintzak Aiaraldea Hedabideari jakinarazi dionez, eguerdian izan da ezbeharra. LAB sindikatuak gertaera salatu du sare sozialetan: "Langile bat hil da Aianox enpresan (Murga-Aiaraldean) istripu ez traumatiko batean".
Goizeko seirak inguruan izan da heriotza, lanean zegoela. 2020. urtean 71 behargin hil direla lanean salatu du LABek
Orozkokoa da zendutakoa, eta 59 urte zituen. "Lanean sartu berritan bihotzekoak eman dio, eta lan zentroan hil da", zehaztu dute. Ertzaintza eta larrialdi zerbitzuak bertaratu dira, baina ezin izan dute ezer egin.
7 lan heriotza, urte bakarrean
Horrenbestez, 7 dira 2020an lanean hildako aiaraldearrak:
- Otsailaren hasieran Galdakaoko GHI Hornos Industriales enpresan beste pertsona batek galdu zuen bizia lanean.
- Otsailaren amaieran Murgako Zorroza Gestión de Residuos enpresan gazte senegaldar bat hil zen.
- Apirilaren 16an Arrigorriagako Talleres Berasategui enpresan Laudioko beste bizilagun batek bere lanpostuan galdu zuen bizia.
- Maiatzaren 5ean Laudioko Forestales Frías enpresarentzat baso lanetan ari zen behargin bati pinu bat erori zitzaion gainean.
- Urrian Delikako txakolindegian erorketa baten ondorioz beste behargin bat hil zen.
- Abenduaren 16an Saratxoko saihesbideko obretan langile bat zendu zen.
LAB sindikatuaren oharra
LABek oharra plazaratu du gertatutakoa salatzeko. “Elkartasuna eta babesa” adierazi diete sindikatuko kideek hildakoaren senide eta lagunei, eta nabarmendu dute istripu ez-traumatikoak lan-istripuak ere direla. “Ez dira kasualitatez izaten lan orduetan, eta ez dira zorte txarraren ondorio, enpresariek esaten duten bezala. Jakina da lan baldintza txarrak, presioak eta estresa direla bihotzeko istripuak sortzen dituzten faktore nagusienetakoak”.
Mota horretako istripuen gorakada egon dela ohartarazi dute: “Istripu ez traumatikoak, bihotzekoak eta iktusak, bilakatu dira heriotza eragin duten lan istripuen lehenbiziko kausak. 2020 urtean hildako langileen %25 istripu ez traumatikoen ondorioz hil da”. Gauzak hala, lan istripu guztien atzean “lan baldintza eta lanaren ezaugarriak” daudela ziurtatu dute, "azpikontratazioa, erritmo azkarrak, presioa, autoritarismoa… gaixotasunak sortu eta batzuetan langileak heriotzara eramaten dituztenak”.
Horren aurrean “bizitza eta enplegu duinen” aldeko aldarria zabaldu du sindikatuak, “lanetik onik eta bizirik bueltatzeko eskubidea dugulako”.