Hil egin da atzo lan istripua izan zuen langilea, LAB sindikatuak baieztatu duenez. 9:30ak aldera jazo zen ezbeharra, Saratxoko saihesbideko obretan. Egitura bat erori zen eta behargin bat zauritu zuen. Larrialdi-zerbitzuak eta Ertzaintza bertaratu ziren istripua jazo zen lekura eta helikopteroz ebakuatu zuten zauritua. Gurutzetako ospitalera eraman zuten eta bertan zendu da.
Bost lan heriotza 2020an
Azken heriotza honekin Aiaraldeko sei behargin dira 2020an lan istripuen ondorioz zendu direnak.
Otsaila hasieran Laudioko 40 urteko bizilagun batek galdu zuen bizia Galdakaoko GHI Hornos Industriales enpresan eta hilabete horren bukaeran gazte senegaldar bat hil zen Murgako Zorroza Gestión de Residuos enpresan.
Zorroza Gestión de Residuos enpresaren kasua bereziki esanguratsua izan zen, heriotzak enpresaren barruko hainbat praktika ilun azaleratu zituelako eta, LAB sindikatuaren arabera, jabeak gorpua mugitzea agindu zuelako, behargina oraindik bizirik zegoenean.
Apirilaren 16an, konfinamendu betean, Laudioko beste bizilagun batek bere lanpostuan galdu zuen bizia, kasu honetan Arrigorriagako Talleres Berastegui enpresan.
Maiatzaren 5ean gertatu zen eskualdeko azken lan heriotza. Laudioko Forestales Frías enpresarentzat baso lanetan ari zen behargin bati pinu bat erori zitzaion gainean, Luiaondon. Horrez gain, Delikako txakolindegian erorketa pairatu zuen langile bat zendu zen urrian.
Gorabeherak obretan
Saratxo Bizirik plataformak eta Administrazio Batzarrak behin baino gehiagotan salatu dituzte Saratxoko saihesbidearen lanetan egondako gorabeherak. Aurreikusitakoa baino lur gehiago desjabetu eta etxe batzuetan arrakalak eragin dituzte lanek, besteak beste.
