Patxita Etxea coworking eta ikasgela zerbitzua ematen hasiko da irailaren 15ean. Anbulatorioa ere hartzen duen eraikinak atzeko partean izango du zerbitzu horietarako sarrera eta Aiarako herritar orok edukiko dute aukera baliatzeko.
Hori bai, lehenik eta behin erabilera baimena eskuratu beharko dute udal bulegoetan edo webgunean. Berez, erabiltzaileek 18 urte edo gehiago izan beharko dute eta 16 edo 17 urtekoek guraso edo tutore legalen baimena aurkeztu beharko dute.
Behin prozedura hori beteta, aplikazioa deskargatu beharko dute interesdunek telefonoan, horren bitartez kudeatuko baita sarrera eraikinean. Udalak gogoratu du aplikazioaren baimena pertsonala izango dela, eta lortu duenari bakarrik emango diola espazioaren erabilerarako eskubidea, 10:00etatik 20:00ak arte.
Tokiko erakundeak beste ohar bat ere zabaldu du. Izan ere, ibilgailuz joaten denak aparkaleku egokituan laga beharko du, Gizarte Zentroaren aurrean, Patxita Etxeko plazak anbulatoriora joaten direnentzat izango baitira.
Abenduan bilera
Berez, Aiarako Udalak bilera deitu zuen iazko abenduan Patxita Etxeari buruzko herritarren iritzia jasotzeko.
Hain zuzen, proiektuak ibilbide luzea egin du. Lehenik eta behin, anbulatorioa ireki zuten 2016an. Gero, irailean hasiko den espazioaren proiektua 2017an hasi ziren lantzen, erabilera anitzeko eremua prestatzeko. Horretarako, Arabako Foru Aldundiari eskatu zioten dirulaguntza.
2020an proiektu teknikoa lizitatu zuten eta 2022an bi aldiz prestatu behar izan zuten lizitazioa obrak gauzatzeko. Prozesu luzearen ostean, iaz, urrian, amaitu zituzten lana.