Ertzaintzak prentsa oharra zabaldu du jakinarazteko Amurrioko epaitegiaren esku utzi duela 18 urteko gazte bat, drogen salmenta leporatuta.
Zehazki, atxiloketa atzo gertatu zen eguerdian. Azken asteotan hainbat aldiz egin duten moduan, drogen kontsumoaren prebentziorako esku-hartzea egin zuen poliziak. Kasu honetan Aiaraldeko ikastetxe baten inguruetan izan zen. Lau gaztek osatzen zuten talde batengana hurbildu ziren agenteak, haxixa erretzen ari zirelako.
Gero, gazteak identifikatu eta miatu zituzten. Horren ondorioz, bi adingaberi haxixa topatu zieten eta isundu zituzten bide publikoan substantzia sorgorgarriak edukitzeagatik eta kontsumitzeagatik, Herritarren Segurtasunari buruzko Legea ('Mozal Legea') urratzea leporatuta. Horrez gain, hirugarren bat, 18 urtekoa, atxilotu zuten, 50 gramo haxix zituelako. Poliziak leporatu dio legez kanpoko substanzien salmenta.
Atxilotua Laudioko Ertzain Etxera eraman ondoren, gaur bertan utzi dute Amurrioko Epaitegiaren esku.
Aipatu beharra dago azken hilabeteetan antzeko hamaika esku-hartze egin dituela poliziak. Asteburu honetan, Orozkon eta Amurrion, pasa den ostegunean Laudion eta urtarrilean Laudioko herriguneko bi tabernatan, parkean edota ikastetxeen kanpoaldean.