Bizilagun batek haragi hondarrak aurkitu zituen atzo arratsaldean Laudioko Gardea auzoan, eta txakur jabeen kezkak piztu ditu horrek. Haragi hondarrak albaitari batengana eraman zituzten, eta pozoia zutenik ziurtatzerik izan ez zuten arren, arreta eskatu dute txakurrekin zonalde horretatik paseatzerako orduan. Izan ere hainbatetan egin dira bertan animaliak kaltetzeko ekintzak. 2020an hiru txakur hil ziren Gardea auzoan estrikninaz pozoitutako janari arrastoak jan ostean.
Pozoia ez ezik, usteldutako janaria ere aurkitu dute hainbatetan, albaitari eta txakur jabeek jakinarazi dutenez.
Eraso ugari Aiaraldean
Tamalez, ohikoak dira animalien aurkako gisa honetako erasoak eskualdean. 2018an bi katu pozoitu zituzten Laudioko Lateorro auzoan, eta horietako bat hil egin zen. Aretan aurkitutako hegaluze lata batek piztu zituen alarmak azkenekoz, baina erretiratzea lortu zuten animaliaren batek jan aurretik.
Laudion ez ezik, eskualdeko beste hainbat herrietan ere jazo dira animalien aurkako ekintzak. Urduñan katuak tirokatu zituzten Landatas auzoan 2021eko azaroan, eta Tertangan ere jazo ziren antzeko gertakariak sei hilabete lehenago, kasu horretan katua hil egin zen. Orozkon eta Okondon txakurrak tirokatuta hil zituzten ere. Belandian, aldiz, txakur batek bizia galdu zuen zepo batean harrapatuta geratu ostean.
Ertzaintzak sei salaketa jaso ditu soilik azken lau urtetan, kasu gehienak salatu gabe geratzen direla agerian utziz. Animalien jabeek, ordea, gertaera hauei merezi duten garrantzia emateko eskatu dute.