Abasto plazako merkatariek mezua zabaldu dute sare sozialetan jakinarazteko ez dakitela noiz ekingo dioten berriro euren ohiko jarduerari Zubiko Kurajoko lokalean.
Izan ere, aurreikusitakoaren arabera, astelehenean hasi behar ziren lanean kokapen berrian, baina oraindik ez dute "argindarrik, ezta Iberdrolako hargunerik, besteak beste".
Berez, merkatariek Udalari egotzi diote aurreikuspen falta eta epe errealistak ez izatea. Halaber, euren ustez, ez zituzten ekainaren 1ean euren kokalekutik atera behar.
Gauzak horrela, barkamenak eskatu dizkiete bezeroei eta azaldu dute ahalik eta lasterren ikusteko irrikan daudela.
Epe estuak dirulaguntza jasotzeko
Hau izan da Abasto plazako berritzeak eragin duen soka luzearen azken atala. Izan ere, EAJk eta PSE-EEk aurreko legealdian sustatutako proiektua izan zen, Europako diru-funtsen bitartez. EH Bildu eta Omniaren gobernu taldeak eskumenak hartu eta gutxira adierazi zuen bitarteko propioekin ekingo ziotela obrari, diru hori jasotzeko epeak ez zirela beteko argudiatuta.
Gerora, Next Generation dirulaguntza (1,6 milioi eurokoa) eskuratzeko aukera berretsi ondoren, EH Bilduk eta Omniak proiektu berria lizitatu zuten (parte hartze prozesua egin ondoren). Baina, babes ekonomikoa bermatzeko, obraren %60 egikaritu beharko dute aurten.