Aingeru Olaguenaga Orozkoko zinegotziak gaur aurreratu du Azalera podcastean bi kontzertu berezi izango dituztela aurten San Antolin jaietan. Jai batzordeak hautatu ditu emanaldiak. Henry Mendezek joko du irailaren 4an, Berakatz Egunean. Aldiz, hurrengo egunean, zapatuan, Zea Maysek hartuko du oholtza.
Orozkoko Udaleko ordezkariak azpimarratu du azken urteetan asmoa izan dutela Zea Mays ekartzeko, baina gauza batzuk edo besteak direla medio, ezin izan dutela. "Euskal Herriko talde inportante eta polita da eta arantza bat kendu dugu, legealdia amaitu baino lehen kontratatuta", azaldu du Olaguenagak.
Taldea disko berriaren sorkuntza prozesuan buru-belarri sartuta dago. Londresen aritu dira horretarako eta Bilbon ere grabaketa saioa egin dute. Gainera, Artiñano Etxean ere grabazioa egin zuten bilbotarrek 2022an.
Henry Mendez, apustu ezberdina
Euskal rockaren doinuetatik oso urrun, Sanantolinetako Jai Batzordeak Henry Mendez Dominikar Errepublikako artista aukeratu du Berakatz Egunean jotzeko. Barikuan, hortaz, erritmo latindarrek hartuko dute protagonismoa.
Mendez ezaguna da Bizkaian Athletic Clubeko ospakizunetan parte hartu duelako, bai Sevillako Athletic Hirian zein Errege Kopako garaipen festan. Zinegotziak espero du harrera ona izatea musikariak.
Edonola ere, gogoratu beharra dago iraileko jaiak heldu baino lehen hainbat hitzordu egongo direla herrian, larunbat honetako azokatik hasita.