Giro ederrean bukatu dute Aiarako jaien txanpa nagusia. Ostiralean izan zen txupinazoa, eta festa lehertu da geroztik. Igandean bukatu zen txanpa nagusia, baina apirilaren 28an emango diete amaiera aurtengo sanprudentzio jaiei. Arespalditzan izan dira ekintza gehienak, artzain txakur txapelketa salbu. Hala, herriko plazan kokatu dute karpa eta txosnagunea, eta orotariko ekintzak egon dira egun hauetan.
Esate baterako, ostiralean, Aiara Dantza taldearen emanaldia izan zen nagusi, kontzertuek lekukoa hartu zioten arte. Larunbat goizean, berriz, txikien duatloia antolatu zuen Iñaki Isasi taldeak, eta haur zein guraso ugari bertaratu ziren kirolaz gozatzera. Txirrindularitza lasterketa ere burutu zuten arratsaldean.
Ildo beretik, egun osoan zehar jolas parkea izan zuten umeek Arespalditzako pista estalian, eta Xaiborren dantza saioak girotu zuen txosnagunea ondoren. Horrez gain, ihes gela bilakatu dute karabana bat, Aiarako Emakumeen Gelaren aurrean; eta barrakak ere ez dira falta izan.
Domekan, ostera, 'Igande morea' antolatu zuten lehenbizikoz. Batetik, emakumeen herri kirolen erakustaldia eta txapelketa ekarri zuten erdigunera. Bestetik batukada feministaren tailerreko andreek kalejira egin zuten herrian barrena. Yogurinha Borovaren ikuskizunak eta dantza-plazak mantendu zuten pizturik igande arratsaldea, karpa bete jende bertaratu zen erromeriaz eta euskal dantzez gozatzera. Asteburuari itxiera emateko, berriz, odolosteak banatu zituzten hurbildutakoen artean.
Ostegunean, apirilaren 28an, bukatuko dira 2022ko Aiarako jaiak. Alabaina, ekintza ugari dituzte aurretik oraindik: 10:30ean kalejira egongo da, 11:00etan azoka, 12:00etan meza, 12:30ean Hitzalde abesbatza eta 13:00etan Etxaurren Ikastolako danborrada. Arratsaldean, berriz, pilota jaialdia (18:00-20:00) eta Puro Relajoren kontzertua (19:00) edukiko dituzte zain aiaraldearrek.