Aiarako udalerriak jarraitzen du energia azpiegituren proiektuak metatzen bere gain. Azken urteetan Ferosca I parke eolikoa, Solariako goi-tentsioko linea, energia berriztagarria biltegiratzeko baterien instalazioa Markixanan eta Las Americas 20 zentral eolikoa bere lurraldean eraikitzeko urratsak egin dituzte erakunde publikoek zein pribatuek.
Zerrenda luze horri gehitu behar zaio orain Igebelar Solar azpiegitura fotovoltaikoa, zeina Zaraobeko gainetik gertu egongo litzatekeen, Amurrio eta Olabezarreko lursailak hartuta.
Proiektua Ventaja Solar 8 SL enpresak sustatu du eta 3,44 MW ekoizteko instalazioa izango litzateke. Zazpi lursail okupatuko lituzke; sei Amurrion eta bakarra Aiaran, 3,83 hektarea guztira.
Abuztuaren 14an jaso zuten dokumentazioa
Aiarako Udalaren lehenengo salaketa izan da ingurumenaren gaineko eraginaren ebaluzio txostena abuztuaren 14an heldu zela udaletxera. Hau da, zubi baten bezperan eta hainbat udal langileren oporren erdian.
Horren aurrean, tokiko erakundeak luzapena eskatu zuen, alegazioak ganoraz lantzeko, baina Eusko Jaurlaritzak uko egin zion eskaerari. Ondorioz, Udalak ez du denborarik izan informazioa herritarren artean zabaltzeko, berak nahi zuen moduan. Dena den, tarte urrian izan bada ere, bederatzi Administrazio Batzarrek ere alegazioak sinatzea lortu dute.
Gauzak horrela, Aiarako Udalak argudiatu du helegitea prestatu duelako herrira heltzen ari direlako proiektuak inolako plangintza orokorrik gabe eta egitasmo guztien irudia beharko luketela beharrak eta babesteko inguruak analizatzeko. Udalaren aburuz, Energia Berriztagarrien Sektore Plana egotea da gutxieneko baldintza horrelako erabakiak hartzeko eta, momentuz, ez dago esparru hori arautuko duen dokumenturik.
Are gehiago, Udalak erantsi du planaren zirriborroan ez dagoela aurreikusita Olabezarreko eremu horretan azpiegitura fotovoltaikoak eraikitzea.
