Imanol Pradales EAJko lehendakarigaia Laudioko anbulatorioan egon da gaur zenbait alderdikiderekin; Jonatan Moreno amurrioarrarekin eta Maite Cortazar laudioarrarekin, besteak beste.
Osakidetzako Etengabeko Arreta Guneei buruz hitz egin du Pradalesek: "Euskadin EAG berri batzuk zabaltzea aztertuko dugu eta daudenetan osasuneko profesional eta osagile gehiago sartzea ebaluatuko dugu. Analisi hori eginda daukagunean, Arabako EAGak lehenetsiko ditugu, bereziki Laudio eta Gasteizkoak. Gure konpromisoa da".
Osasun sistema publikoari dagokionez, lehendakarigaiak honakoa esan du: "Proposatu nahi dugu akordio politiko eta sozial zabala, gure sistema osatzen duten eragileen arteko elkarrizketa ireki bidez garatuko duguna: administrazioak, eragile politiko eta sozialak, profesionalen elkargo eta elkarteak, unibertsitateak, gaixoen elkarteak eta farmaziak, besteak beste".
Asteburu mugitua Etengabeko Arreta Gunean
EAJko hautagaiaren bisitaren bezperan, lehen planora egin du salto eskualdeko Etengabeko Arreta Guneen egoerak. Berez, martxoaren 31n eta apirilaren 1ean ez da egon medikurik Amurrion eta horrek Laudioko larrialdietan izan du eragina. Esaterako, igandean bi orduko itxaronaldiak egon ziren bertan.
Dena den, urtarrilaren 12an David Hernandezen heriotza gertatu zenetik, Aiaraldeko osasun publikoaren egoerak herri plataformen mobilizazioak, sindikatuen salaketak eta alderdien zein erakundeen arteko gatazkak eragin ditu.