Azken hilabeteetan hainbat lapurreta jazo dira Urduñako Somolsa fabrika abandonatuan. Udalak Aiaraldea komunikabideari azaldu dionez, lapurrek eraikinaren estrukturaren hainbat zati eraman dituzte, eta sabaia erori da horren ondorioz.
Hori dela eta, Eusko Jaurlaritzako Ingurumen Sailera jo du tokiko erakundeak. Izan ere, fabrikaren sabaia uralitaz eginda zegoen. Material hori amiantoz osatuta dago, epe luzera birikietako minbizia eragiten duen elementua. Gauzak hala, zonaldea garbitzea bilakatu da udalarentzako lehentasuna, herritarrentzako arriskutsua izan ez dadin.
Sabadell bankua eta Elkargi finantza-entitatea dira lursailaren jabeak. “Eurekin hitz egin dugu eta onartu egin dute amiantoa kentzearen ardura euren gain hartzea”, azaldu dio Itziar Biguri alkateak Aiaraldea Komunikabideari, “salaketa ere jarri dute, egondako lapurretengatik”.
Dena den, bi entitateek diru inbertsio handia egin beharko dute amiantoa modu seguruan kentzeko. Enpresa espezializatu batek egin behar du lan hori, eta aurrekontuak altuak izan ohi dira. Latiorroko Ikastetxean zegoen uralita kentzeko, adibidez, 800.000 euro baliatu behar izan zituen Hezkuntza Sailak iaz.
Gainera, kontuan hartu behar da Somolsako uralita oso egoera txarrean dagoela, plakak sabaietik erori eta txikitu egin direlako.
Ia bi hamarkada itxita
2004. urtean itxi zituen ateak Somolsak. Ordainketak etenda ditu orduz geroztik, eta 2,4 milioi euroko zorra du pilatuta ogasunarekin.
Iazko azaroan ehunka lagun bildu ziren lantegi horretan, 'SOS Aiaraldea' lemapean. Bailara berrindustrializatzeko plan bat eskatu zuten, besteak beste.
Abenduan, aldiz, sutea egon zen fabrikan, baina ez zuen kalte handirik eragin.
