Amaitu da 2024a eta, honenbestez, iritsi da urteari errepasoa egiteko unea. 1.066.127 bisita pilatu ditu Aiaraldea.eus atariak urte osoan zehar, 2.073.280 ikusitako orrirekin. Ohikoan bezala, azken uneko gertakariek pilatu dituzte ikustaldi gehienak, baina bestelako eduki sakonagoak ere sartu dira urteko eduki zabalduenen zerrendan.
Hauek izan dira 2024ko hamar eduki ikusienak:
1. Ertzaintza drogen aurkako operazio zabala gauzatzen ari da Laudioko erdiguneko bi tabernatan
Ertzaintzak hainbat operazio burutu zituen eskualdeko tabernetan urteko lehen hilabeteetan. Laudion egin zuten lehena urtarrilean, eta zeresan handia sortu zuen.
2. ESK sindikatuak salatu du atzo ez zegoela medikurik Laudioko anbulatorioan 42 urteko herritar bat hil zenean
David Hernandez ‘Fabi’ laudioarraren heriotzak eskualdeko osasun sistema publikoaren egoera eraman zuen eztabaida publikora.
3. Emakume bat hil da Amurrion, trenak harrapatuta
Emakume bat hil zen martxoaren 31n Amurrion, trenak harrapatuta. Ertzaintzak adierazi zuenez, trenbidea igarotzeko egokia ez zen toki batean gertatu zen harrapaketa. Azken zortzi urteetan bi herritar zendu dira trenek istripuz harrapatuta eta epaitegietan daude bi kasuak.
4. Korrikak Aiaraldean barrena egin duen ibilbide osoa, hemen ikusgai
Aiaraldea Komunikabideak zortzi orduko zuzeneko emisioa egin zuen Korrikak eskualdean barrena eginiko ibilbidea jarraitzeko, eta milaka ikustaldi izan zituen saio berezi horrek.
5. Roberto Gonzalez: "Osakidetza hondoratzen ari da, osasun publikoko arazo larri baten aurrean gaude"
Osasun sistema publikoaren harira Roberto Gonzalez medikuari eginiko elkarrizketak interes nabarmena sortu zuen, webguneko bisita datuetan ikusi daitekeenez.
6. Operazio berria egin du Ertzaintzak Laudioko Lamuza Parkean
Laudioko bi tabernetan drogen aurkako operazio zabala egin eta gutxira, beste esku hartze bat egin zuen Ertzaintzak Lamuza parkean eta Lanbide Heziketako ikastetxearen alboan.
7. 23. Korrikaren ibilbidea Aiaraldean barrena, kilometroz kilometro
Korrikaren eskualdeko ibilbideko kilometro guztiak erakusten dituen mapak milaka ikustaldi izan zituen Aiaraldea.eus atarian, euskararen aldeko ekimen ibiltariak sortzen duen zirrararen seinale.
8. Euskadiko Bolo Txapelketa, Luiaondotik zuzenean
Euskadiko Bolo Txapelketa jokatu zen ekainean Luiaondoko bolatokian. Aiaraldea Komunikabideak zuzenean eman zuen proba osoa, eta milaka ikustaldi pilatu zituen emisioak.
9. Fabian Hernandez: "Espero dut nire semearen heriotzak balio izatea Laudion osasun sistema publikoarekin dauden arazoak konpontzeko"
Laudioko Etengabeko Arreta Gunean zendutako David Fernandez ‘Fabi’ laudioarraren aitak elkarrizketa eskaini zion Aiaraldea Komunikabideari heriotza jazo eta egun gutxira, eta zabalkunde nabarmena izan zuen.
10. Ertzaintzak herritar bat atxilotu du Aretan, mehatxuak egiteagatik
Martxoan jazotako gertakari honek ez zuen aparteko ondoriorik ekarri, baina interes nabarmena sortu zuen bere unean.