39 langile kaleratu nahi ditu Maderas de Llodiok. Hala jakinarazi die enpresako zuzendaritzak Enpresa Batzordeko kideei, "produktibitate eta antolaketa kausak" argudiatuta. Azaldu dutenez, Garnica taldearen beste lantegi batzuetara eraman nahi dute ekoizpenaren zati bat (egurrezko ohol zehatz batzuk egiteaz arduratzen dena).
Enpresa Batzordeak, bere aldetik, jakinarazi du ez duela kaleratzerik onartuko, eta bi greba egun deitu ditu irailaren 16 eta 18rako, ohartarazita "mobilizazio eta greba" gehiago egingo dituztela zuzendaritzak atzera egiten ez badu.
Beharginen ordezkariek azaldu dutenez, atzo egin zuten langile asanblada eta bertan hartu zuten erabakia. "Enpresari adierazi diogu gure helburu bakarra hitzarmen kolektiboaren negoziazioa berreskuratzea dela, baina soilik kaleratze horiek bertan behera utzita, plantilla osoarentzako kalte larri bat suposatzen dutelako", azaldu dute, Maderas de Llodion "inor soberan ez dagoela" nabarmenduta.
Bi greba egun egingo dituzte datorren astean, eta gehiago deituko dituzte zuzendaritzak atzera egiten ez badu.
Duela astebete jakinarazi zien zuzendaritzak Enpresa Batzordeko kideei kaleratze kolektibo bat burutzeko asmoa zuela, baina neurri horren dimentsioa zehaztu gabe. Gaur eguerdian egin dute bilera, eta bertan eman du enpresak bere asmoen berri. Sindikatuek gogorarazi dute "uztaileko azken asteetan hitzarmenaren negoziazio-prozesu bete-betean" zeudela zuzendaritzarekin, eta hainbat puntutan aurrera egiten ari zirela. Gauzak hala, elkarrizketaren dinamika haustea leporatu diote konpainiari, "zuzenean langileen etorkizunaren aurka" joz.
Bederatzi ordezkariko Enpresa Batzordea
Hiru ordezkari ditu LABek Maderas de Llodioko Enpresa Batzordean, eta bina ELA, CCOO eta UGTk. Sindikatu abertzaleko kideek berretsi dute ez dutela inolako lanpostu galerarik onartuko eta, horretarako, ezinbestekotzat jo dute "ekintza sindikala aktibatzea". ELAk ere uste du "irmo" erantzun behar zaiela enpresaren asmoei, "mobilizazio eta greba gehiagorekin".
5 milioi euroko inbertsioa iragarri zuen Garnicak 2022an Laudioko lantegian.
5 milioi euroko inbertsioa
Laudioko enpresa historikoetako bat da Maderas de Llodio. 1982 urtean hasi zuen bere ibilbidea, eta 2018. urtean eskuratu zuen Garnica enpresa taldeak.
2022a urte mugitua izan zen Laudioko lantegian. Garnicak iragarri zuen 5 milioi euroko inbertsioa egingo zuela Laudioko lantegian. Pinuz eginiko kontratxapatuaren ekoizpen gaitasuna handitu nahi zuten modu horretan, dibertsifikazio estrategia berri bat garatzearekin batera.
Martxoa eta apirilean sute bana egon ziren fabrikan. Dena den, gertakari ikusgarriak izan ziren arren, kalteak ez ziren berebizikoak izan, eta maiatzean itzuli ziren beharginak lanera. Urrian Carlyle Group inbertsio funtsa bilakatu zen Garnica taldearen akziodun nagusia, ICG funtsak zuen tokia hartuta. Azaroan, aldiz, enplegua aldi baterako erregulatzeko espedientea aurkeztu zuen zuzendaritzak, martxoaren 31ra arte indarrean egon zena.
